Дәрілік заттың медицинада қолданылуы жөніндегі нұсқаулық. Ксеплион

Қазақстан Республикасы Денсаулық сақтау министрлігі Медициналық және фармацевтикалық қызметті бақылау комитеті Төрағасының 2013 жылғы 12 Қазан 896 бұйрығымен БЕКІТІЛГЕН Дәрілік заттың медицинада қолданылуы жөніндегі нұсқаулық Ксеплион Саудалық атауы Ксеплион Халықаралық патенттелмеген атауы Палиперидон Дәрілік түрі Ұзақ әсер ететін бұлшықет ішіне енгізуге арналған суспензия 50 мг/0.5 мл, 75 мг/0.75 мл, 100 мг/1 мл, 150 мг/1.5 мл Құрамы 1 мл суспензияның құрамында белсенді зат - 156.0 мг палиперидон пальмитаты бар (100.0 мг палиперидонға баламалы), қосымша заттар: полисорбат 20, макрогол 4000 (полиэтиленгликоль 4000), лимон қышқылының моногидраты, сусыз натрий гидрофосфаты, натрий дигидрофосфатының моногидраты, натрий гидроксиді, инъекцияға арналған су. Сипаттамасы Бөгде қосылыстардан бос ақ немесе ақ дерлік суспензия Фармакотерапиялық тобы Психотропты препараттар. Нейролептиктер (Антипсихотиктер). Басқа да нейролептиктер. Палиперидон. АТХ коды N05AX13 Фармакологиялық қасиеттері

Фармакокинетикасы Суда ерігіштігінің айрықша төмен екеніне орай, палиперидон пальмитаты бұлшықет ішіне енгізгеннен кейін баяу ериді және жүйелі қан ағымына сіңеді. Бұлшықет ішіне бір рет енгізгеннен кейін қан плазмасында палиперидон концентрациясы баяу ұлғаюмен дельта тәрізді бұлшықетке енгізгеннен кейін 13-14 күннен соң (медиана) және бөксе бұлшықетіне енгізгеннен кейін 13-17 күннен соң жоғары шегіне жетеді. Заттың босап шығуы 1-ші күні-ақ белгілі болып, кем дегенде, 126 күн сақталады. Ксеплион препаратының белсенді компоненті босап шығуының және дозалау сызбасының сипаттамалары емдік концентрацияларының ұзақ сақталуын қамтамасыз етеді. Дельта тәрізді бұлшықетке бір реттік 25-150 мг дозаны енгізгеннен кейінгі ең жоғары концентрациясы (Сmax), орта есеппен, бөксе бұлшықетіне енгізгеннен кейінгіден 28% көбірек. Ем басында препаратты дельта тәрізді бұлшықетке енгізу, бөксе бұлшықетіне енгізуден гөрі, палиперидонның (1-ші күні 150 мг және 8-ші күні 100 мг) емдік концентрациясына жылдам жетуге көмектеседі. Көп реттік инъекциялардан кейін әсер ету айырмашылығы аз көрініс береді. Ең жоғары және тепе-тең палиперидон концентрацияларының орташа қатынасы Ксеплион препаратының 100 мг доза 4 инъекциясын бөксе бұлшықетіне енгізгеннен кейін 1,8-ге, ал дельта тәрізді бұлшықетке енгізгеннен кейін 2,2-ге тең болды. Палиперидонның 25-150 мг дозаларында палиперидонның «концентрация-уақыт» қисығы астындағы ауданы (AUC) дозаға пропорционал өзгеріп, ал Сmax 50 мг-ден көп дозаларында дозаға пропорционалдығынан аз дәрежеде ұлғайды. Ксеплион препаратын 25-150 мг дозаларда енгізгеннен кейінгі палиперидонның жартылай шығарылу кезеңінің медианасы 25-49 күн шектерінде ауытқыды. Препарат енгізілгеннен кейін ( )-палиперидон энантиомері ішінара (+)- энантиомерге айналады, әрі (+)- және (-)-энантиомерлерінің AUC қатынасы шамамен 1,6-1,8 құрайды. Қауымдық талдауда палиперидонның болжамды таралу көлемі 391 л-ге тең болды; палиперидон қан плазмасы ақуыздарымен 74% байланысады. Белсенді компоненті дереу босап шығатын 1 мг 14С-палиперидон препаратын бір рет ішу арқылы қабылдағаннан кейін бір аптада енгізілген дозаның 59%-ы өзгеріссіз күйде несеппен шығарылады; бұл бауырда препараттың айтарлықтай метаболизмі болмайтынын көрсетеді. Енгізілген радиобелсенділігінің шамамен 80%-ы несептен, 11%-ы нәжістен табылды. Препарат метаболизмінің 4 жолы in vivo белгілі, бірақ олардың бірінде де енгізілген дозаның 6,5%-дан көп метаболизмі: дезалкилденуі, гидроксилденуі, дегидрогенизациясы, бензизоксазол тобының ыдырауы болмайды. Іn vitro зерттеулері CYP2D6 және CYP3A4 изоферменттерінің палиперидон метаболизмінде белгілі бір рөлі барын жорамалдауға мүмкіндік береді, осы изоферменттердің палиперидон метаболизміндегі елеулі рөлі жөнінде in vivo деректері жоқ. Қауымдық фармакокинетикалық талдауда CYP2D6 метаболизмі белсенді және әлсіз адамдарда препарат ішу арқылы қабылданғаннан кейін палиперидон клиренсінің байқалымды айырмашылығы анықталмаған. Адам бауырының

микросомалары пайдаланылатын in vitro зерттеулері палиперидонның дәрілік заттар метаболизмін CYP1A2, CYP2A6, CYP2D6, CYP2E1, CYP3A4 және CYP3A5 изоферменттерімен елеулі тежемейтінін көрсетті. Іn vitro зерттеулерінде палиперидон P-гликопротеин субстратының қасиеттерін, ал жоғары концентрацияларда әлсіз P-гликопротеин тежегіші қасиеттерін танытты. Тиісінше in vivo деректері жоқ, әрі бұл мәліметтердің клиникалық мәні анық емес. Тұтас алғанда, қан плазмасындағы палиперидон концентрациясы Ксеплион препаратын бұлшықет ішіне енгізгеннен кейінгі жүктеме кезеңінде белсенді компонентінің босап шығуымен ұзақ әсер ететін палиперидонды 6 және 12 мг аралығындағы дозаларда ішу арқылы қабылдағаннан кейінгідей ауқымда болды. Палиперидон жүктемесінің пайдаланылған сызбасы тіпті дозалар арасындағы аралық соңында да (8-ші және 36-шы күн) концентрацияның осы ауқымда сақталуын қамтамасыз етеді. Ксеплион препаратын әртүрлі емделушілерде енгізгеннен кейінгі палиперидон фармакокинетикасының жекеше айырмашылықтары ұзақ әсер ететін палиперидонды ішу арқылы қабылдағаннан кейінгіден азырақ болды. Екі препаратты қолданған кезде қан плазмасындағы палиперидон концентрациясы медианасының өзгеру сипатының айырмашылығына орай, олардың фармакокинетикасын тікелей салыстырған кезде сақтық таныту керек. Науқастардың ерекше санаттары Бауыр қызметінің бұзылуы. Палиперидон бауырда елеулі метаболизмге ұшырамайды. Ксеплион препаратын ауырлығы жеңіл немесе орташа дәрежедегі бауыр қызметінің бұзылуы бар науқастарда қолдану зерттелмесе де, бауыр қызметінің осындай бұзылуларында дозаны реттеу қажет емес. Ауырлығы орташа дәрежедегі бауыр қызметінің бұзылуы бар науқастарда (Чайльд-Пью бойынша В класы) палиперидон ішу арқылы қолданылған зерттеуде қан плазмасындағы бос палиперидон концентрациясы дені сау еріктілердегідей болды. Бауыр қызметі ауыр дәрежеде бұзылған науқастарда палиперидон қолдану зерттелмеген. Бүйрек қызметінің бұзылуы. Ауырлығы жеңіл дәрежеде бүйрек қызметі бұзылған науқастар үшін палиперидон дозасын азайту керек; Ксеплионды ауырлығы орташа дәрежедегі және ауыр дәрежелі бүйрек қызметінің бұзылуы бар науқастарда қолдану ұсынылмайды. Бүйрек қызметінің бұзылу дәрежесі әртүрлі науқастар ұзақ әсер ететін 3 мг палиперидон таблеткасын бір рет ішке қабылдағаннан кейін палиперидонның таралуы зерттелді. Креатинин клиренсінің (КК) азаюымен палиперидон шығарылуы: бүйрек қызметі бұзылуының ауырлығы жеңіл дәрежесінде (КК 50-80 мл/мин) - 32%, ауырлығының орташа дәрежесінде (КК 30-50 мл/мин) 64%, ауыр дәрежесінде (КК 10-30 мл/мин) 71% әлсіреді, соның нәтижесінде AUC0-, дені сау еріктілермен салыстырғанда, тиісінше, 1,5, 2,6 және 4,8 есе ұлғайды. Ксеплион препаратын ауырлығы жеңіл дәрежедегі бүйрек қызметінің бұзылуы бар науқастарда қолдану деректер санының көп еместігіне және фармакокинетикасын үлгілеу нәтижелеріне сүйеніп, осындай науқастарға ұсынылған палиперидонның жүктеме дозасын 1-ші күні 100 мг және 1 апта

өткенде 75 мг; одан кейін ай сайын (әр 4 аптада) 50 мг енгізеді; дозаны әркімдегі жеке көтерімділігіне және/немесе тиімділігіне қарай, 25-100 мг ауқымда арттыруға немесе азайтуға болады. Егде жастағы науқастар. Жас ерекшелігі дозаны реттеуді талап ететін өз алдына бөлек фактор саналмайды. Алайда мұндай реттеу жас ұлғаюымен креатинин клиренсінің азаюына орай қажет болады. Нәсілі. Ішке қабылдауға арналған палиперидон зерттеулерінің нәтижелерін қауымдық фармакокинетикалық талдауда препаратты әртүрлі нәсілді адамдар қабылдағаннан кейін палиперидон фармакокинетикасының айырмашылықтары анықталмаған. Жынысы. Ерлер мен әйелдердегі палиперидон фармакокинетикасының клиникалық маңызды айырмашылықтары табылған жоқ. Препарат фармакокинетикасына шылым шегудің әсері. Адамның бауыр микросомалары пайдаланылатын in vitro зерттеулеріне сай, палиперидон CYP1A2 субстраты болып саналмайды, сондықтан темекі тарту палиперидон фармакокинетикасына әсер етпеуі тиіс. Осы in vitro деректерімен сәйкес, қауымдық фармакокинетикалық талдауда шылым шегетін және шекпейтін адамдардағы палиперидон фармакокинетикасының айырмашылықтары анықталмаған. Фармакодинамикасы Палиперидон пальмитаты палиперидонға дейін гидролизденеді. Соңғысы көбінесе серотонинді 5-HT2A-рецепторлардың, сондай-ақ дофаминді D2- рецепторлардың, адренергиялық α1- және α2- рецепторлардың және Н1- гистаминді рецепторлардың орталық әсер ететін белсенді антагонисті болып табылады. Палиперидон холинергиялық м-рецепторлармен және адренергиялық β1- және β2- рецепторлармен байланыспайды. Палиперидонның (+) және (-) энантиомерлерінің фармакологиялық белсенділігі саны мен сапасы жағынан бірдей. Шизофрения кезінде препараттың емдік тиімділігі D2 және 5-HT2A рецепторларының біріккен бөгелісімен шартталған деп жорамалданады. Қолданылуы - шизофренияны емдеу және шизофрения қайталануларының алдын алу Қолдану тәсілі және дозалары ПРЕПАРАТТЫ ТАМЫРЛАРҒА НЕМЕСЕ ТЕРІ АСТЫНА ЕНГІЗУГЕ БОЛМАЙДЫ! Палиперидонды ішу арқылы немесе рисперидонды ішу арқылы әлде парентеральді ешқашан қабылдамаған науқастарға Ксеплион препаратымен емделуді бастар алдында 2-7 күн ішінде ішуге арналған палиперидон немесе рисперидон көтерімділігін тексеру ұсынылады. Ксеплион препаратымен емделуді 1-ші күні 150 мг және 1 апта өткенде 100 мг дозадан бастау (екі инъекция да дельта тәрізді бұлшықетке) ұсынылады. Әріқарай ай сайын 75 мг доза енгізу ұсынылады; жекеше көтерімділігіне және/немесе тиімділігіне қарай, дозаны 25-150 мг ауқымында көбейтуге немесе

азайтуға болады. Екінші дозадан соң кейінгі инъекцияларды дельта тәрізді немесе бөксе бұлшықетіне салуға болады. Демеуші доза ай сайын ретке келтіруге болады. Осы орайда палиперидон пальмитатынан белсенді компоненттің ұзақ босап шығатынын есепке алу керек, өйткені дозаны өзгерту тиімділігі бірнеше айдан соң ғана толық көрініс береді. Дозаны өткізіп алу Дозаны өткізіп алудан сақтану. Палиперидонның екінші қайтара жүктеме дозасын алғашқы дозадан кейін 1 аптадан соң енгізу ұсынылады. Егер бұл мүмкін болмаса, оны 2 күн ертерек немесе кешірек енгізуге болады. Ұқсас тұрғыда, үшінші және кейінгі дозаларды ай сайын енгізу ұсынылады, бірақ егер бұл мүмкін болмаса, инъекцияны 7 күн ертерек немесе кешірек салуға болады. Егер Ксеплион препаратының екінші инъекциясы уақытында жасалмаса (бір апта ± 2 күн) алғашқы инъекция салынған күннен бастап өткен уақытқа қарай емдеуді жаңғырту ұсынылады. Екінші бастапқы дозаны өткізіп алу (4 аптадан аз мерзім). Егер алғашқы инъекция салынған күннен 4 аптадан аз уақыт өтсе, емделушіге мүмкіндігінше тезірек дельта тәрізді бұлшықетке 100 мг дозада екінші инъекция енгізу керек. Ксеплион препаратының 75 мг дозадағы үшінші инъекциясын алғашқы инъекциядан кейін 5 апта өткенде дельта тәрізді немесе бөксе бұлшықетіне жасаған жөн (екінші инъекция уақытын есепке алмай). Әріқарай жекеше көтерімділігіне және/немесе тиімділігіне қарай дельта тәрізді немесе бөксе бұлшықетіне салынатын 25 мг-ден 150 мг-ге дейінгі дозадағы инъекциялардың ай сайынғы курсы қадағалануы тиіс. Екінші бастапқы дозаны өткізіп алу (4-тен 7 аптаға дейінгі мерзім). Егер Ксеплион препаратының алғашқы инъекциясы салынған күннен 4-тен 7 аптаға дейін өтсе, емдеуді келесі сызба бойынша 100 мг дозадағы екі инъекция енгізумен жаңғыртады: алғашқы инъекцияны мүмкіндігінше тезірек дельта тәрізді бұлшықетке салады; 1 апта өткен соң дельта тәрізді бұлшықетке екінші инъекция жасайды, одан кейін жекеше көтерімділігіне және/немесе тиімділігіне қарай дельта тәрізді немесе бөксе бұлшықетіне 25 мг-ден 150 мг-ге дейінгі дозада ай сайынғы инъекциялар курсын жалғастырады. Екінші бастапқы дозаны өткізіп алу (7 аптадан аса). Егер Ксеплион препаратының алғашқы инъекциясын салған күннен 7 аптадан көп өтсе, емдеуді Ксеплион препаратымен емдеу бастамаланған жағдайдағы сияқты бастайды. Демеуші дозаны өткізіп алу (1 айдан 6 аптаға дейінгі мерзім). Емдеу басталған соң Ксеплион препаратының инъекциясын ай сайын жасау ұсынылады. Егер соңғы инъекция салған сәттен 6 аптадан аз өтсе, алдыңғысына тең кезекті дозаны мүмкіндігінше тез енгізу керек. Содан кейін препарат ай сайын енгізіледі. Демеуші дозаны өткізіп алу (> 6 аптадан 6 айға дейінгі мерзім). Егер Ксеплион препаратының соңғы инъекциясын салған сәттен 6 аптадан көп өтсе, мынадай кеңестер беріледі: 25 мг-ден 100 мг-ге дейінгі дозада тұрақтандырылған емделушілер үшін:

1) Препарат инъекциясын дельта тәрізді бұлшықетке инъекцияны өткізіп алғанша емделушінің жай-күйі тұрақтандырылған дозада мүмкіндігінше жылдам жасайды; 2) Келесі инъекцияны апта өткен соң 8-ші күні (дәл сондай доза) дельта тәрізді бұлшықетке салады; 3) Әріқарай жекеше көтерімділігіне және/немесе тиімділігіне қарай дельта тәрізді немесе бөксе бұлшықетіне жасалатын ай сайынғы инъекциялар курсын 25 мг-ден 150 мг-ге дейінгі дозада жаңғыртады. 150 мг дозада тұрақтандырылған емделушілер үшін: 1) 100 мг доза дельта тәрізді бұлшықетке мүмкіндігінше тез енгізіледі; 2) 1 апта өткен соң (8-ші күні) тағы бір 100 мг дозаны дельта тәрізді бұлшықетке салады; 3) Әріқарай жекеше көтерімділігіне және/немесе тиімділігіне қарай дельта тәрізді немесе бөксе бұлшықетіне жасалатын ай сайынғы инъекциялар курсын 25 мг-ден 150 мг-ге дейінгі дозада жаңғыртады. Демеуші дозаны өткізіп алу (> 6 ай мерзім). Егер Ксеплион препаратының соңғы инъекциясын салған сәттен 6 айдан көп өтсе, онда ем басталу үшін жоғарыда сипатталғандай, емдеуді қайтадан бастайды. Қолдану тәсілі ПРЕПАРАТТЫ ТАМЫРЛАРҒА НЕМЕСЕ ТЕРІ АСТЫНА ЕНГІЗУГЕ БОЛМАЙДЫ! Ксеплион тек бұлшықет ішіне енгізуге арналған. Препарат бұлшықетке терең баяу енгізіледі. Инъекцияларды медициналық қызметкер ғана салуы тиіс. Бүкіл дозаны бір ретте енгізеді; дозаны бірнеше инъекциялармен енгізуге болмайды. Қан тамырына кездейсоқ түсіп кетуін болдырмау керек. Ксеплион препаратын дельта тәрізді бұлшықетке енгізуге арналған иненің ұсынылатын өлшемі емделушінің дене салмағына қарай белгіленеді. Дене салмағы 90 кг науқастар үшін жинақтағы сұр корпусты ұзын ине ұсынылады. Дене салмағы <90 кг науқастар үшін жинақтағы көгілдір корпусты қысқа ине ұсынылады. Препаратты оң жақ және сол жақ дельта тәрізді бұлшықетке кезекпен енгізу керек. Ксеплион препаратын бөксе бұлшықетіне енгізу үшін жинақтағы сұр корпусты ұзын ине ұсынылады. Инъекцияларды бөксенің жоғарғы сыртқы төрттен бір бөлігіне салу керек. Препаратты оң жақ және сол жақ бөксе бұлшықетіне кезекпен енгізген жөн. Ксеплион мен палиперидонды ішу арқылы немесе рисперидонды пероральді немесе парентеральді бір мезгілде қолдану зерттелмеген. Палиперидон рисперидонның негізгі белсенді метаболиті екендіктен, осы препараттарды Ксеплион препаратымен бір мезгілде қолданғанда палиперидонның аддитивті әсер етуі мүмкін екенін ескерген жөн. Бауыр қызметі бұзылған науқастар Ксеплион препаратын бауыр қызметі бұзылған науқастарда қолдану зерттелмеген. Ішке қабылданатын палиперидонды зерттеу нәтижелері бойынша, ауырлығы жеңіл немесе орташа дәрежедегі бауыр қызметінің

бұзылуы бар науқастар үшін дозаны реттеу қажет емес. Бауыр қызметі ауыр дәрежеде бұзылған науқастарда палиперидон қолдану зерттелмеген. Бүйрек қызметі бұзылған науқастар Ксеплион препаратын бүйрек қызметі бұзылған науқастарда қолдану жүйелі зерттелмеген. Ауырлығы жеңіл дәрежедегі бүйрек қызметінің бұзылуы бар науқастарда (креатинин клиренсі минутына 50-ден < 80 мл-ге дейін) Ксеплион препаратын қолдануды 1-ші күні 100 мг және 1 апта өткенде 75 мг дозадан бастау (екі инъекция да дельта тәрізді бұлшықетке) ұсынылады. Содан кейін дельта тәрізді немесе бөксе бұлшықетіне ай сайын 50 мг енгізеді; жекеше көтерімділігіне және/немесе тиімділігіне қарай, дозаны 25-150 мг ауқымында көбейтуге немесе азайтуға болады. Ксеплионды бүйрек қызметі орташа немесе ауыр дәрежеде бұзылған науқастарда (креатинин клиренсі < 50 мл/мин) қолдану ұсынылмайды. Егде жастағы науқастар Тұтас алғанда, бүйрек қызметі қалыпты егде жастағы науқастарға Ксеплион препаратының бүйрек қызметі қалыпты жастау науқастарға арналғандай дозасы ұсынылады. Егде жастағы науқастарда бүйрек қызметі төмендеуі мүмкін, сондықтан мұндай науқастарға бүйрек қызметі бұзылған науқастар үшін жоғарыда келтірілген нұсқаулар ұсынылады. Балалар мен жасөспірімдер Ксеплион препаратын 18 жасқа толмаған науқастарда қолдану қауіпсіздігі мен тиімділігі зерттелмеген. Науқастардың басқа да ерекше санаттары Ксеплион препаратының дозасын науқастардың жынысына, нәсіліне және шылым шегуіне қарай реттеу қажет емес. Басқа нейролептиктерден ауысу Шизофрениямен науқастарды басқа нейролептиктерден Ксеплионға көшіру немесе оны басқа нейролептиктермен бір мезгілде қолдану жөніндегі деректер жүйелі түрде жинақталмаған. Ішу арқылы палиперидонды немесе ішу арқылы әлде инъекциялық рисперидонды ешқашан қабылдамаған емделушілер үшін Ксеплион препаратымен емделуді бастар алдында ішуге арналған палиперидон немесе ішуге арналған рисперидон көтерімділігі зерттелуі тиіс. Ксеплион препаратымен емдеудің басында бұрын ішу арқылы қолданылып жүрген нейролептиктерді тоқтатуға болады. Ксеплионды жоғарыда «Қолдану тәсілі және дозалары» бөлімінде сипатталғандай тағайындау керек. Егер емделуші ұзақ әсер ететін инъекциялық нейролептиктер алатын болса, Ксеплион препаратымен емдеуді кезекті инъекция жоспарланған сәтте бастайды. Сосын Ксеплион препаратымен емдеуді айына 1 рет жалғастырған жөн. Емдеудің алғашқы аптасында бастапқы доза қажет емес. Рисполепт Конста алатын науқастарға Ксеплион препаратының инъекциясын келесі сызба бойынша бастау керек: Рисполепт Конста соңғы дозасы Бастапқы Ксеплион дозасы

25 мг әр 2 аптада 50 мг айына 1 рет 37,5 мг әр 2 аптада 75 мг айына 1 рет 50 мг әр 2 аптада 100 мг айына 1 рет Ұсынылуынан жоғары немесе төмен бастапқы дозаларын әркімге жеке тәртіпте қарастыруға болады. Әріқарайғы ай сайынғы дозаларын жоғарыдағы сипатталуына сай таңдап, яғни жекеше көтерімділігіне және/немесе тиімділігіне қарай 25-150 мг ауқымда көбейту немесе азайту керек. Ксеплион препаратын тоқтатқан кезде белсенді компонентінің ұзақ босап шығатынын ескерген жөн. Басқа нейролептиктер жағдайындағыдай, экстрапирамидалық белгілер дамуының алдын алатын дәрілер қолдануды жалғастыру қажеттілігін әлсін-әлсін бағалаған дұрыс. Алдын ала толтырылған еккіш Сұр корпусы бар ұзын ине Көгілдір корпусы бар қысқа ине Ине корпусы Ине корпусы Резеңке қалпақшасы Қолдану жөнінде нұсқаулар ПРЕПАРАТТЫ ТАМЫРЛАРҒА НЕМЕСЕ ТЕРІ АСТЫНА ЕНГІЗУГЕ БОЛМАЙДЫ! Еккіш тек бір рет енгізуге арналған. 1. Біркелкі суспензия алу үшін еккішті 10 секундтай қарқынды сілкіңіз.

2. Сәйкес инені таңдап алыңыз. ДЕЛЬТА ТӘРІЗДІ бұлшықетке дене салмағы < 90 кг науқастарға енгізу үшін қысқа ине (көгілдір корпусты), ал дене салмағы 90 кг науқастарға ұзын ине (сұр корпусты) пайдаланылады. БӨКСЕ бұлшықетіне енгізу үшін ұзын инені (сұр корпусты) пайдаланады. 3. Еккішті тігінен ұстап тұрып, сағат тілімен ұқыпты айналдыра, оның резеңке қалпақшасын шешіңіз. 4. Қауіпсіз иненің қаптамасын жартылай ашыңыз, қаптаманың сыртынан иненің қалпақшасын ұстаңыз да, сағат тілімен ұқыпты айналдыра, еккішті иненің люэр қалпақшасына орнатыңыз.

5. Инені бойлай тартумен инеден қалпақшаны шешіңіз. Қалпақшаны айналдырмаңыз, өйткені бұл иненің еккішпен жалғануын әлсіретуі мүмкін. 6. Еккішті инесін жоғары қарата ұстап, поршенді сәл басумен, еккіштен ауаны итеріп шығарыңыз.

7. Еккіштің ішіндегісін түгел таңдалған (дельта тәрізді немесе бөксе) бұлшықетке енгізіңіз. Препаратты қан тамырына немесе тері астына енгізбеңіз! 8. Инъекция аяқталғаннан кейін бас бармақпен (8а сурет) немесе сұқ саусақпен (8b сурет) немесе еккішті қатты беткейінен басып (8с сурет) ине қорғанысын жұмысшы қалыпқа келтіріңіз. Ине қорғанысы сырт етіп бекітілуі тиіс. Инелі еккішті талапқа сай ережемен жойып жіберіңіз. 8a 8b

8c Жағымсыз әсерлері Қолайсыз жағымсыз реакциялардың (ҚЖР) көпшілігі әлсіз немесе орташа ауырлықта болды. Емделушілерде байқалған қолайсыз реакциялар төменде көрсетілген. Қолайсыз реакциялар жиілігі былайша жіктелген: өте жиі ( 10%), жиі ( 1 % және < 10%), жиі емес ( 0,1% және < 1%), сирек ( 0,01% және < 0,1%), өте сирек (< 0,01%) және жиілігі белгісіз. Өте жиі 10% - ұйқысыздық - қозу - бас ауыру Жиі 1% және < 10% - жоғарғы тыныс жолдарының жұқпалары - түнгі шым-шытырық түстер, мазасыздық - дене салмағының артуы - акатизия (гиперкинезия, мазасыз аяқтар синдромын, мазасыздықты қоса), бас айналу, экстрапирамидалық белгілер, ұйқышылдық, паркинсонизм (акинезия, брадикинезия, «тісті дөңгелектер» типті сіресу, сілекей ағу, экстрапирамидалық белгілер, глаберальді рефлекстің ауытқуы, бұлшықеттердің сіресуі, бұлшықеттердің қарысуы, қаңқа-бұлшықеттік қозғалыссыздық) - артериялық қысымның көтерілуі - іштің жоғарғы бөлігінің ауыруы, іш қату, диарея, ауыз қуысының шырышты қабығының құрғауы, жүрек айну, тіс ауыру, құсу, іш аумағындағы жайсыздық - аяқ-қолдардың ауыруы, қаңқа-бұлшықет ауыруы - астениялық бұзылыстар, әлсіздік, жергілікті реакциялар (инъекция орынындағы ауыру, қышыну, тығыздану) - гиперпролактинемия Жиі емес 0,1% және < 1% - акародерматит, бронхит, тері асты шелмайының қабынуы, құлақ жұқпалары, көз жұқпалары, тұмау, онихомикоз, пневмония, тыныс жолдарының жұқпалары, синусит, теріастылық абсцесс, тонзиллит, несеп шығару жүйесінің жұқпалары, цистит - аса жоғары сезімталдық - анорексия, гипергликемия, тәбеттің төмендеуі, тәбеттің артуы, дене салмағының азаюы, полидипсия, қант диабеті - депрессия, ұйқының бұзылуы, маниялар, сананың шатасуы, жыныстық құмарлықтың төмендеуі

- қозғалыс үйлесімінің бұзылуы, цереброваскулярлық бұзылулар, құрысулар (соның ішінде эпилепсиялық құрысулар), зейін қоя алмау, постуральді бас айналу, дизартрия, дискинезия (соның ішінде атетоз, хорея, хореоатетоз, қозғалыстың бұзылуы, бұлшықеттердің жиырылуы, клоникалық құрысулар), дистония (соның ішінде блефароспазм, мойынның тартылуы, эмпростотонус, беттің тартылуы, гипертония, ларингоспазм, бұлшықеттердің еріктен тыс жиырылуы, миотония, көз алмасының қимылдары, опистотонус, орофарингеальді түйілу, плеврототонус, сардониялық күлімсіреу, тетания, тілдің салдануы, тілдің тартылуы, қисық мойын, жақ сүйектердің құрысулы қарысуы), гипестезия, парестезия, ауыр дискинезия, тремор, психомоторлық гиперреактивтілік, естен тану - көздің құрғауы, көз жасының көп ағуы, окулярлы гиперемия, көз алмасының еріксіз қимылдауы, анық көрмеу сезімі, конъюнктивит - вертиго, құлақтың ауыруы, құлақтағы шуыл - атриовентрикулярлы бөгеліс, брадикардия, электрокардиограммадағы бұзылулар, электрокардиограммадағы QT ұзаруы, синустық аритмия, жүрекшелер фибрилляциясы, постуральді ортостатикалық тахикардия синдромы, тахикардия, ортостатикалық гипотензия, гипотензия, пальпитация - жөтел, диспноэ, мұрыннан қан кету, мұрынның бітелуі, жұтқыншақ-көмей аумағының ауыруы, тыныс жолдарының бітелуі, ысқырып дем алу, өкпенің бітелуі - диспепсия, дисфагия, нәжісті ұстай алмау, метеоризм, гастроэнтерит, тілдің ісінуі, дисгевзия - акне, терінің құрғауы, экзема, эритема, гиперкератоз, есекжем, жайылған қышыну, бөрту, алопеция - артралгия, арқаның ауыруы, буындардың қарысуы, буындардың ісіп кетуі, бұлшықеттер түйілуі, мойынның ауыруы - дизурия, поллакиурия, несепті ұстай алмау - аменорея, эякуляцияның бұзылуы, эректильді қызметтің бұзылуы, қынаптық бөліністер, галакторея, гинекомастия, сексуалдық қызметтің бұзылуы, етеккір іркілуі, етеккір бұзылуы - кеуде аумағының жайсыздануы, қалтырау, дімкәстану, беттің ісінуі, жүрістен жаңылу, еккен жердегі тығыздану, ісіну (соның ішінде жайылған ісіну, шеткергі ісіну, жұмсақ ісіну), шөлдеу, дене температурасының көтерілуі - нейтропения, ақ қан жасушалары санының азаюы, анемия, гематокрит көрсеткішінің азаюы, эозинофилия, гамма-глутамилтрансфераза белсенділігінің жоғарылауы, бауыр ферменттері белсенділігінің ұлғаюы, трансаминазалар белсенділігінің артуы, қандағы холестерин концентрациясының көтерілуі, қандағы триглицеридтер концентрациясының көбеюі, гипергликемия Сирек ( 0,01 % және <0,1 %) - тромбоцитопения, креатинфосфокиназа деңгейі артуы - диурезге қарсы гормонның дұрыс сөл бөлмеуі - гипогликемия - терең көктамырлар тромбозы, ишемия, тромбоздар, ысынулар

- панкреатит, фекалома, хейлит - несептің бөлінуінің іркілісі - гипотермия, инъекция енгізген жердегі абсцесс, инъекция енгізген жердегі тері асты шелмайының қабынуы, инъекция енгізген жердегі гематома, дене температурасының төмендеуі, қалтырау, тоқтату синдромы - аффективтік тегістелу, аноргазмия - қатерлі нейролептикалық синдром, церебралдық ишемия, тітіркендіргіштерге жауап бермеу, естен тану, диабеттік кома, басты шайқау - глаукома, көз қозғалысының бұзылуы, жарықтан қорқу - гипервентиляция, аспирациялық пневмония, дисфония -дәрілік бөртпе, терінің түссізденуі, себореялық дерматит, қайызғақ - рабдомиолиз, позотониялық реакциялар, бұлшықет әлсіздігі - кеуде ауыруы, сүт бездерінің өрескелденуі, кеуденің ұлғаюы, емшек ұшынан бөліністер болуы. Өте сирек (<0,01 %) - агранулоцитоз - диабеттік кетоацидоз, сумен уыттану - өкпе артериясының эмболиясы - ангиоэдема - ұйқыдағы апноэ синдромы - сарғаю - ішек бітелуі - приапизм - жаңа туған нәрестелердегі тоқтату синдромы - инъекция енгізген жердегі киста, инъекция енгізген жердегі некроз, инъекция енгізген жердегі ойық жара Постмаркетингтік бақылаулар бойына анафилактикалық реакциялар өте сирек анықталды. Белгісіз жиілікпен - босаң нұрлы қабық интраоперациялық синдромы - глюкозурия Қолдануға болмайтын жағдайлар - палиперидонға немесе препараттың кез келген компонентіне аса жоғары сезімталдық Палиперидон рисперидонның белсенді метаболиті болғандықтан, Ксеплион рисперидонға аса жоғары сезімталдығы белгілі науқастарға қарсы көрсетілімді. Дәрілермен өзара әрекеттесуі Ксеплион Q-T аралығын ұзартуы мүмкін, сондықтан оны Q-T аралығын ұзартатын өзге дәрілік заттармен абайлап үйлестіру керек (аритмияға қарсы дәрілік заттар, соның ішінде хинидин, прокаинамид, амиодарон, соталол; антипсихотикалық дәрілік заттар (хлорпромазин, тиоридазин); антибиотиктер, соның ішінде гатифлоксацин, моксифлоксацин).

Палиперидон пальмитаты палиперидонға дейін гидролизденетіндіктен, дәрілік өзара әрекеттесу мүмкіндігін бағалаған кезде ішке қабылданатын палиперидонды зерттеу нәтижелерін ескерген жөн. Ксеплион препаратының басқа препараттарға әсер ету қабілеті Ксеплионның Р450 цитохромы жүйесінің изоферменттерімен метаболизденетін препараттармен клиникалық елеулі фармакокинетикалық өзара әрекеттестік танытуы күтілмейді. Адамның бауыр микросомалары пайдаланылған in vitro зерттеулері Ксеплионның CYP1A2, CYP2A6, CYP2C8/9/10, CYP2D6, CYP2E1, CYP3A4 және CYP3A5 изоферменттерімен заттардың метаболизденуін онша әлсіретпейтінін көрсетті. Сондықтан палиперидонның осы изоферменттермен метаболизденетін препараттар клиренсін клиникалық тұрғыда елеулі азайтуы күтілмейді. Сонымен қатар, Ксеплионның изоферменттер индукторы қасиеттерін танытуы күтілмейді, өйткені in vitro зерттеулерінде Ксеплион CYPA2, CYPC19 немесе CYP3A4 изоферменттерінің белсенділігін индукцияламаған. Ксеплион жоғары концентрацияларында Р-гликопротеиннің әлсіз тежегіші болып табылады. Алайда осыған қатысты in vivo деректері жоқ, әрі бұл құбылыстың клиникалық мәні белгісіз. Ксеплионның ОЖЖ-не әсер ететінін ескеріп, Ксеплионды орталықтан әсер ететін өзге дәрілік заттармен және алкогольмен біріктіріп қолданғанда сақ болу керек. Ксеплион леводопаның және дофамин рецепторы агонистерінің әсерін әлсіретеді. Ксеплион препаратының ортостатикалық гипотензия туғызу қабілетіне орай, Ксеплион препаратын осындай қабілетке ие басқа препараттармен бірге қолданғанда осы әсердің аддитивті күшеюі байқалуы мүмкін. Ішуге арналған ұзақ әсер ететін палиперидонды күніне 1 рет 12 мг дозада және ұзақ әсер ететін натрий дивалпроекс таблеткаларын (күніне бір рет 500 мг-ден 2000 мг дейінгі дозада) бір мезгілде қолдану вальпроат фармакокинетикасына әсер етпейді. Литий мен палиперидонның фармакокинетикалық өзара әрекеттесу ықтималдығы аз. Басқа препараттардың Ксеплионға әсер ету қабілеті Палиперидон CYP1A2, CYP2A6, CYP2C9, CYP2C19 және CYP3A5 изоферменттерінің субстраты емес. Бұл осы изоферменттердің тежегіштерімен және индукторларымен өзара әрекеттесу ықтималдығының әлсіз екенін жорамалдауға мүмкіндік береді. Іn vitro зерттеулері палиперидон метаболизміне CYP2D6 және CYP3A4 қатысу мүмкіндігінің тым аз екенін көрсетсе де, қазіргі уақытта бұл ферменттердің палиперидон метаболизмінде елеулі рөл атқаратыны туралы in vitro немесе in vivo деректері жоқ. Іn vitro зерттеулері палиперидонның P-гликопротеин субстраты болып саналатынын айғақтайды. Палиперидон шектеулі дәрежеде CYP2D6 изоферментімен метаболизденеді. Ішке қабылданатын палиперидонның белсенді CYP2D6 тежегіші пароксетинмен өзара әрекеттесуін зерттегенде дені сау еріктілерде

палиперидон фармакокинетикасының клиникалық елеулі өзгерістері болған жоқ. Белсенді компоненті ұзақ босап шығатын палиперидонды (күніне 1 рет) карбамазепинмен бір мезгілде (200 мг тәулігіне 2 рет) ішу арқылы қабылдау палиперидонның орташа Сmax пен AUC мәндерінің шамамен 37% азаюына әкелді. Бұл төмендеу едәуір дәрежеде палиперидонның бүйректік клиренсінің 35% ұлғаюынан болады, бүйректік P-гликопротеиннің карбамазепинмен белсенділенуі есебінен болуы ықтимал. Бүйрек арқылы өзгермеген күйде шығарылған препарат мөлшерінің өте көп емес азаюы карбамазепиннің метаболизм арқылы бауырда шоғырланған палиперидонға немесе оның биожетімділігіне әлсіз ғана әсер ететінін жорамалдауға мүмкіндік береді. Карбамазепин қолдану басталғанда Ксеплион препаратының дозасын қайта қарастырып, қажет болса, көбейту керек. Керісінше, карбамазепинді тоқтатқанда Ксеплион препаратының дозасын қайта қарастырып, қажет болса, азайту керек. Палиперидон физиологиялық рн тұсында катион болып саналып, негізінен өзгеріссіз күйде бүйрек арқылы жартысы сүзілу жолымен, жартысы белсенді сөлініс арқылы шығарылады. Катиондардың бүйректерде белсенді тасымалдану жүйесін тежейтін триметопримді бір мезгілде қолдану палиперидон фармакокинетикасына әсер еткен жоқ. Ішуге арналған ұзақ әсер ететін палиперидонды күніне 1 рет 12 мг дозада және ұзақ әсер ететін натрий дивалпроекс таблеткаларын (күніне 1 рет 500 мг-ден 2 таблетка) бір мезгілде қолданғанда палиперидонның C max және AUC мәндерінің 50% жоғарылауының ішу арқылы қабылдағанда препарат сіңірілуінің артуы нәтижесінде байқалуы ықтимал. Жалпы клиренсіне едәуір әсер етуі байқалмағандықтан, ұзақ босап шығатын натрий дивалпроекс таблеткалары мен Ксеплион препараты арасында клиникалық мәнді өзара әрекеттесуі күтілмейді. Ксеплион препаратымен өзара әрекеттесуіне зерттеу жүргізілмеген. Литий мен палиперидон фармакокинетикалық өзара әрекеттесу ықтималдығы аз. Ксеплион препаратын рисперидонмен бірге қолдану Ксеплион препаратын рисперидонмен бірге қолдану зерттелмеген. Палиперидон рисперидонның белсенді метаболиті болғандықтан, Ксеплион препараты мен рисперидон бір мезгілде қолданылғанда қан плазмасында палиперидон концентрациясының жоғарылайтынын ескеру керек. Айрықша нұсқаулар Қатерлі нейролептикалық синдром Нейролептиктер, соның ішінде палиперидон қолданылғанда гипертермиямен, бұлшықет сіресуімен, вегетативтік жүйке жүйесінің орнықсыздығымен, сананың бұзылуымен және қан сарысуында креатинфосфокиназа концентрациясының жоғарылауымен сипатталатын қатерлі нейролептикалық синдромның (ҚНС) дамуы тіркелген. Ол өз алдына, миоглобинурия (рабдомиолиз) және жедел бүйрек жеткіліксіздігі байқалуы мүмкін. ҚНС

болжануына мүмкіндік беретін белгілер пайда болғанда, Ксеплионды қоса, нейролептиктердің бәрі тоқтатылады. Кешеуілді дискинезия Дофамин рецепторлары антагонистерінің қасиеттерін иеленетін препараттар қолдану ең алдымен тілдің және/немесе бет бұлшықеттерінің ырғақты, еріктен тыс қимылдарымен сипатталатын кешеуілді дискинезияның дамуымен қатар жүреді. Кешеуілдеген дискинезия белгілері пайда болғанда, Ксеплионды қоса, барлық нейролептиктерді тоқтату мүмкіндігін қарастыру керек. Гипергликемия және қант диабеті Ксеплион препаратымен емдегенде гипергликемия, қант диабеті және бұрыннан бар қант диабетінің өршуі байқалды. Атипиялық антипсихотикалық препараттар қолдану мен глюкоза алмасудың бұзылулары арасындағы өзара байланысты анықтау шизофрениясы бар емделушілерде қант диабетінің жоғары даму қаупіне және жалпы қауымда қант диабетінің кең таралуына орай қиындаған. Осы факторларды ескеріп, атипиялық антипсихотикалық препараттар қолдану мен гипергликемиямен байланысты жағымсыз әсерлердің дамуы арасындағы өзара байланыс толық анықталмаған. Барлық емделушілерде гипергликемия мен қант диабеті белгілерінің бар-жоғына клиникалық бақылау жасау қажет («Жағымсыз әсерлері» бөлімін қараңыз). Дене салмағының артуы Атипиялық антипсихотиктермен емдегенде дене салмағының едәуір артуы байқалды. Емделушілердің дене салмағына бақылау жасау қажет. Деменциясы бар егде науқастар Ксеплион препаратын деменциясы бар егде жастағы науқастарда қолдану зерттелмеген. Палиперидон рисперидонның белсенді метаболиті екендіктен рисперидон қолдану тәжірибесін есепке алу керек. Рисперидон мен фуросемид қабылдайтын деменциясы бар егде емделушілерге тән өлімнің көп болуы байқалды. Осы жағдайды түсіндіретін патофизиологиялық механизмдер анықталмаған. Сонда да, препаратты осындай жағдайларда тағайындағанда ерекше сақ болған дұрыс. Басқа диуретиктерді рисперидонмен бірге бір мезгілде қабылдайтын емделушілерде өлудің көбеюі болмаған. Емдеуге қарамастан, дегидратация өлім қаупінің жалпы факторы болып табылып, деменциясы бар егде емделушілерде мұқият бақылануы тиіс. Лейкопения, нейтропения, агранулоцитоз Лейкопения, нейтропения және агранулоцитоз антипсихотикалық дәрілер қолданғанда, соның ішінде Ксеплион препаратын қолданған кезде білінді. Агранулоцитоз постмаркетингтік бақылаулар кезінде өте сирек білінді. Сыртартқысында лейкоциттер санының клиникалық мәнді азаюы немесе препаратқа тәуелді лейкопения/нейтропениясы бар емделушілерге емнің алғашқы айлары кезінде толық қан талдауын жасау ұсынылады, Ксеплион препаратымен емдеуді тоқтату басқа да болжамды себептер болмаса, лейкоциттер санының алғашқы клиникалық елеулі азаюы тұсында қарастырылуы тиіс. Клиникалық мәнді нейтропениясы бар емделушілерге температураның көтерілуі немесе жұқпа белгілерінің пайда болуы тұрғысынан

тексеріліп тұру, әрі мұндай белгілер пайда болғанда емделуді дереу бастау ұсынылады. Нейтропенияның ауыр түрі бар емделушілерге (нейтрофильдердің абсолютті саны 1 х 109/л-ден аз) Ксеплион препаратын қолдану лейкоциттер саны қалпына түскенше тоқтатылуы тиіс. Көктамырлық тромбоэмболизм Антипсихотикалық препараттар қолданылғанда көктамырлық тромбоэмболия жағдайлары болды. Антипсихотикалық препараттар қабылдаған емделушілерде көктамырлық тромбоэмболияның даму қаупі жиі болады, барлық болжамды қауіп факторлары Ксеплион препаратымен емделуге дейін және емделу кезінде анықталуы тиіс және сақтану шаралары қабылдануы тиіс. Ми қан айналымының бұзылулары Кейбір атипиялық нейролептиктер, соның ішінде рисперидон, арипипразол және оланзапин алған деменциясы бар егде жастағы науқастарда ми қан айналымының, соның ішінде өліммен аяқталған бұзылуының (өтпелі сипаттағы және инсульт) жиілігі жоғары болды. Паркинсон ауруы және Леви денешіктерімен деменция Дәрігер Паркинсон ауруы немесе Леви денешіктерімен деменциясы бар науқастарда, Ксеплионды қоса, нейролептиктер қолданудың қаупі мен пайдасын салыстыруы тиіс, өйткені науқастардың осы екі санатында да қатерлі нейролептикалық синдромның (ҚНС) жоғары даму қаупі және нейролептиктерге жоғары сезімталдық қаупі болуы мүмкін. Жоғары сезімталдық көріністері сананың шатасуын, ауырсыну сезімталдығының мұқалуын, құлап қалу жиі болатын қалып орнықсыздығын, сондай-ақ экстрапирамидалық белгілерді қамтиды. Приапизм Альфа-адреноблокаторлар қасиеттерін иеленетін препараттардың приапизм туғызу қабілеті жөнінде деректер бар. Приапизм палиперидон қолдануды постмаркетингтік бақылау аясында тіркелген. Құсуға қарсы әсері Палиперидонның клиникаға дейінгі зерттеулерінде құсуға қарсы әсері байқалды. Осы әсердің емделушіде пайда болуы кейбір дәрілермен артық дозалану белгілері мен нышандарын, немесе, мысалы ішек бітелу, Рейе синдромы немесе ми ісігі сияқты жай-күйлерді бүркемелеуі мүмкін. Босаң нұрлы қабық интраоперациялық синдромы Босаң нұрлы қабық интраоперациялық синдромы (IFIS) Инвега препаратын қоса, альфа1а-адренорецепторлары антагонистері әсері бар дәрілік заттар қабылдаған емделушілерде катарактаны сылып тастау бойынша хирургиялық операцияларда анықталды. IFIS көз тарапынан операция кезінде және одан соң асқыну қаупін ұлғайтуы мүмкін. альфа1а-адренорецепторлары антагонистері әсері бар дәрілік препараттарды ағымда және оның алдында пайдаланылғаны туралы ақпарат операция басталғанға дейін офтальмохирургке берілуі тиіс. Катарактадағы операция алдында альфа1-бөгегіш емді тоқтатудың потенциалды артықшылығы

анықталмаған, және оларды нейролептиктермен емді тоқтату қаупін ескере отырып, бағалау керек. Енгізу Бұлшықет ішіне енгізгенде препараттың қан тамырына кездейсоқ түсіп кетуін болдырмау үшін сақтық таныту керек. Ортостатикалық гипотензия Альфа-адреноблокатор белсенділігін иеленетін палиперидон кейбір науқастарда ортостатикалық гипотензия туғызуы мүмкін. Ксеплион жүрекқантамыр аурулары (мысалы, жүрек жеткіліксіздігі, миокард инфарктісі немесе ишемиясы, жүрек өткізгіштігінің бұзылуы), ми қан айналымының бұзылулары немесе артериялық қысымды түсіріп жіберетін жай-күйлері (мысалы, сусыздану, айналымдағы қан көлемінің азаюы, гипотензиялық препараттар қолдану) бар науқастарда сақтықпен қолданылу керек. Құрысулар Басқа нейролептиктер сияқты, Ксеплион сыртартқысында құрысулары немесе құрысу шегі төмендеп кететін басқа ахуалдары бар науқастарда сақтықпен қолданылу керек. Дене температурасын реттеу Нейролептиктер қолданумен организмнің дене температурасын түсіру қабілетінің нашарлауын байланыстырады. Ксеплион препаратын дене температурасын көтеретін әсерлерге, мысалы, күшті дене жүктемесіне, қоршаған ортаның жоғары температурасына, м-холинолитиктер белсенділігі бар препараттар әсеріне, сондай-ақ сусыздануға ұшырауы ықтимал науқастарға тағайындағанда сақтық таныту ұсынылады. Q-T аралығы Басқа нейролептиктер жағдайындағыдай, Ксеплион препаратын сыртартқысында аритмиясы немесе Q-T аралығының туа біткен ұзаруы бар, немесе Q-T аралығын ұзартатын препараттар қабылдайтын науқастарға тағайындағанда сақтық таныту керек. Палиперидонның орталық жүйке жүйесіне (ОЖЖ) ықпал ететінін ескеріп, Ксеплионды ОЖЖ-не әсер ететін өзге дәрілік заттармен және алкогольмен абайлап қолдану керек. Палиперидон леводопа мен дофамин агонистерінің әсерін әлсіретеді. Ксеплион препаратын деменциясы бар егде емделушілерге, Паркинсон ауруы немесе Леви денешіктерімен деменциясы бар емделушілерге тағайындағанда сақтық таныту керек. Жүктілік және лактация Адамдардағы жүктілік кезінде Ксеплион препаратын бұлшықет ішіне немесе палиперидонды ішу арқылы қолдану қауіпсіздігі анықталмаған. Ішуге арналған палиперидонның жоғары дозаларын қолданғанда жануарларда ұрықтар өлуінің аздап артуы байқалды. Ксеплион бұлшықет ішіне енгізілгенде егеуқұйрықтардың буаздық ағымына ықпал еткен жоқ, бірақ оның жоғары дозалары буаз ұрғашылар үшін уытты болды. Палиперидон ішке қабылдағанда және Ксеплион препаратын бұлшықет ішіне енгізгенде адамдағы ең жоғары емдік дозаларынан тиісінше 20-22 есе және 6 есе асып кететін концентрациялар

түзетін дозалар зертханалық жануарлардың тұқым өрбітуіне ықпалын тигізбеген. Ксеплионды жүктілік кезінде, егер ана үшін болжанатын пайдасы ұрыққа төнетін ықтимал қатерден артық болатын жағдайда ғана, қолдануға болады. Ксеплион препаратының адамдардың толғатуы мен босануына әсер етуі белгісіз. Жүктіліктің соңғы триместрінде нейролептиктер қолдану жаңа туған нәрестелердегі қайтымды экстрапирамидалық бұзылыстардың дамуымен қатар жүреді. Палиперидон жануарларда және рисперидон адамдарда қолданылған зерттеулерде палиперидонның емшек сүтімен шығарылатыны анықталды. Сондықтан Ксеплион алатын әйелдер балаға емшек емізбеуі тиіс. Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері Ксеплион зейін шоғырландыруды және психомоторлық реакциялар шапшаңдығын талап ететін әрекеттердің орындалуын нашарлатып, көру қабілетіне әсер етуі мүмкін. Сондықтан науқастарға олардың жекеше сезімталдығы анықталмайынша көлік құралдарын және қозғалмалы механизмдерді басқармауға кеңес беру керек. Артық дозалануы Ксеплион медициналық қызметкерлердің енгізуіне арналғандықтан, емделушілердің онымен артық дозалану ықтималдығы аз. Симптомдары: жалпы, күтілетін белгілері мен симптомдары, яғни ұйқышылдық, мәңгіру, тахикардия, артериялық қысымның төмендеуі, QT аралығының ұзаруы, экстрапирамидалық белгілер палиперидонның белгілі фармакологиялық әсерінің күшеюіне сәйкес келеді. Жедел артық дозалану жағдайында емделушілердің бірнеше препараттар алуы мүмкін екенін есепке алу керек. Емі: науқастардың емдеу және қалпына келтіру қажеттілігін бағалаған кезде белсенді заттың ұзақ босап шығуын және палиперидонның жартылай шығарылуының ұзақ кезеңін есепке алған жөн. Палиперидонның арнайы у қайтарғысы жоқ. Жалпы демеуші шаралар атқару, тыныс жолдарының өткізгіштігін қамтамасыз ету және сақтау, өкпені жеткілікті желдету және қанды оттегімен қанықтыру керек. Болжамды аритмияны анықтау үшін тұрақты ЭКГ мониторингін қоса, жүрек-қантамыр жүйесі қызметін бақылауды дереу бастаған дұрыс. Артериялық қысым түсіп кеткен және айналымдық коллапс жағдайында тиісті шаралар қабылдау керек. Ауыр экстрапирамидалық белгілер дамығанда антихолинергиялық препараттар қолданылады. Науқас ахуалын қалпына келгенше мұқият бақылауға алу керек. Шығарылу түрі және қаптамасы Ұзақ әсер ететін бұлшықет ішіне енгізуге арналған суспензия, 50 мг/0,5 мл, 75 мг/0,75 мл, 100 мг/1 мл, 150 мг/1,5 мл

0.5, 0.75, 1.0, 1,5 мл препараттан циклолефин сополимерінен жасалған еккішке құйылады. Препарат жиынтығына бұлшықетішілік ( дельта тәрізді және бөксе бұлшықетіне) инъекцияларға арналған 2 ине кіреді. Полиэтилен үлбірмен жабылған пластик тұғырдағы 2 инесі бар және препаратпен алдын ала толтырылған еккіш медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынады. Сақтау шарттары 30 С-ден аспайтын температурада сақтау керек. Балалардың қолы жетпейтін жерде сақтау керек! Сақтау мерзімі 2 жыл Жарамдылық мерзімі өткеннен кейін қолдануға болмайды. Дәріханалардан босатылу шарттары Рецепт арқылы Өндіруші Өндірісі, қаптамасы және шығарылуын бақылау: Янссен Фармацевтика Н.В., Бельгия, Турнхоутсевег, 30, В-2340 Беерсе. Тіркеу куәлігін ұстаушы: «Джонсон & Джонсон» ЖШҚ, Ресей. Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы Қазақстан Республикасындағы «Джонсон & Джонсон» ЖШҚ филиалы 050040, Алматы қ., Тимирязев к-сі, 42, 23 «А» павильоны Тел.: +7 (272) 356 88 11 е-mail: DrugSafetyKZ@its.jnj.com